Hvítserkur

Heillar strönd við Húnafjörð
hefur margt að bjóða,
kynnum fagran klettadrang
Hvítserk meðal þjóða.

Aldan sverfur basískt berg
brimið á því skellur,
oft þó komi erfið tíð
aldrei steinninn fellur.

Kalda lít ég klettabrík
krýnda fugladriti.
Heimaslóðin Húnaþing
heldur sínu gliti.                EL

Hinn eilífi svefn

Þegar sef ég út í eitt
ekki stefin kvikna.
Þá lífið hefur litlu breytt
ef ljóðabréfin stikna. 

Oft um nætur yrkja vil
andinn mætir glaður.
Orku bætir af og til
afar gætinn maður.         EL  

Hallgrímur afmælisbarn

Í dag á hann Hallgrímur afmæli. Hann er sambýlismaður einkadóttur minnar og hefur því sérstöðu á þessu heimili og hlotið nafnbótina uppáhalds tengdasonurinn. Hallgrími er margt til lista lagt, semur m.a. sögur og ljóð og málar myndir. Merkasta afrek hans í okkar augum er samt dóttir hans, litla ömmustelpan mín, hún Margrét María sem fæddist í maí 2005. Hann hefur einnig gengið ömmustráknum mínum Kára Daníeli í föðurstað og er þáttur hans í þessari fjölskyldu geysi stór.
Fyrir áramótin sýndi hann okkur mikið listaverk sem hann málaði og er trúlega dýrasta málverk Íslandssögunnar en andvirði þess 21.000.000 kr. rann til hjálpar nauðstöddum börnum í Afríku. Listaverkið er svo magnað að það bókstaflega límdist á sjónhimnuna og sé ég það ljóslifandi fyrir mér.  Einn auðmanna þjóðarinnar snaraði fram þessum milljónum og verður gaman þegar þetta kyngimagnaða málverk verður kynnt fyrir þjóðinni.  Mörg ljóða Hallgríms eru skemmtileg og rákumst við hjónin á sonnettur eftir hann á vef Jónasar Hallgrímssonar fyrir stuttu. Bóndinn á þessum bæ hefur verið að leika sér við sonnettugerð undanfarið, ég birti kannski sonnetturnar þeirra síðar. Hallgrímur er drengur góður og sinnir stórfjölskyldunni vel og auðgar líf okkar og mesta listaverkið hans er Margrét María - augasteinn ömmu sinnar og yndi allra. MN

Útskrift frá Bifröst

Valgeir Már útskrifaðist í gær með BS próf í viðskiptalögfræði frá Háskólanum á Bifröst.  Hann hóf námið á haustönn 2005 og hefur því haldið vel á spöðunum.  Skólinn er í örum vexti og gaman að sjá hvernig hann vex og dafnar í hrauninu við Grábrók.  Umhverfið setur mark sitt á skólastarfið; bæði hvað varðar námið og eins félagslífið.

Við óskum Valgeiri hjartanlega til hamingju með þennan merka áfanga og erum viss að námið muni nýtast honum í starfi og leik.  Hann hefur nú þegar fengið starf í sinni heimabyggð Sauðárkróki.

Bestu fréttir

Á mánudaginn fór ég að hitta Agnesi Smáradóttur, krabbameinslækninn minn. Þá lágu fyrir niðurstöður úr sneiðmyndatöku og blóðprufum sem teknar voru vikunni áður og er skemmst frá því að segja að allt litur ljómandi vel út í líkama mínum.    Ég veit að margir lesa bloggið mitt og er ég mjög stolt og þakklát fyrir það -ættingjar, vinir og vandamenn hafa fylgst með sjúkdómsbrölt mínu undanfarin tvö ár og veitt mér ómetanlegan stuðning og uppörvun. En nú er það versta að baki og tími til kominn að bretta upp ermarnar og komast í mark. Bestu kveðjur og þakklæti til allra. María

 

ps er ekki hætt að blogga og held áfram með afmælissyrpuna......... ábendingar vel þegnar.

Afmælisbarn 4. febrúar

Um daginn auglýsti ég eftir þátttakendum í afmælissyrpu febrúarmánaðar en enginn hefur gefið sig fram enn sem komið er. Áhugaleysi blogglesara mun ekki aftra mér frá að halda ótrauð áfram og í dag er Atli Björn E Levy afmælisbarn. Hann er orðinn 28 ára, strákurinn, - stór og sætur karlmaður. Á myndinni er hann að lesa upp ljóð í afmæli pabba síns frá því í fyrra, ljóðið er eftir Kristínu Þorsteins, KÞ - sem hún orti til vinar síns og samkennara, Eggerts. Atli Björn er orðinn töluvert fullorðins, búinn að mennta sig og farinn að vinna og býr með sinni ágætu kærustu Ásdísi Jónu. Hann fylgir sem sagt ekki spænska kerfinu sem mikið var í fréttum á dögunum en eins og menn muna þá er Hótel mamma dáldið vinsæl á Spáni. Atli Björn er gull að manni, íþróttamaður og heilbrigð sál í hraustum líkama. Hann hljóp heimdragann að hætti Fjölnismanna og stundaði nám erlendis, í Þýskalandi og BNA - nánar til tekið í Seattle, ásamt því að líta við í HÍ. Ekki fara sögum af eymd og volæðin hjá honum eins og hrjáði þá Fjölnismenn á sínum tíma, alla vega var ekki efnt til samskots til að halda í honum lífinu. Enda námslán og aðrir möguleikar í boði núna og trúlega hefur Atli fengið styrki til að stunda sitt nám enda mikill námsmaður og maður góður og margir tilbúnir að veðja á hann.
Umsóknarfrestur til að taka þátt í afmælissyrpunni rennur aldrei út, endilega hafið samband og bendið á áhugaverð afmælisbörn.

Merkismenn

Úr ljóði til Agnars þegar hann varð sextugur

Framámaður sinnar sveitar,
setti markið hátt.
Stefnufastur stöðugt leitar,
stendur við sinn þátt.

Niðurlag á ljóði til Lárusar þegar hann varð sextugur
Megi farsæld fylgja þér
fögur tilvist skína.
Láttu aldrei góði grér
gleði þína dvína.

Afmælisbörn dagsins eru Agnar J Levy og Lárus Gíslason sem eru báðir mágar mínir. Til hamingju með afmælið kæru karlar. Á efri myndinni er Agnar mágur minn og á þeirri neðri má sjá Lárus sem er líka mágur minn. Þessir kátu karlar eru skemmtilega samtaka í garð mágkonu sinnar hvað varðar afmælismál. Lárus er á miðri neðri myndinni ásamt Braga Erlends og Norðdahls fraukunum Maríu - Eddu og Ásu - á góðri stundu. Þá eru nú afmælisbörn janúar komin á bloggið. Afmælisbörn febrúar eru vinsamlega beðin að gefa sig fram hið fyrsta svo undirbúningur geti hafist fyrir frekari útfærslur. MN

Merkisbarn

Þessi mynd er af Marcus litla sem er sonur Lárusar Freys og Jane sem búa í Horsens í Danmörku. Hann fæddist 8. janúar og er því eitt af afmælisbörnum janúarmánaðar ásamt fleiri merkismönnum. Lárus Freyr er sonur Hörpu Lárusdóttur sem er dóttir Eddu systur minnar. Þegar grant er rýnt í ættfræðina þá kemur í ljós að ég er langömmusystir þessa litla snáða. Finnst mér það mjög virðulegur titill. Ef smellt er á myndina er hægt að skoða þennan fallega dreng betur og glöggir sjá að hann líkist föður sínum töluvert.  MN

Vísnavinir

Að eiga vísnavin er skemmtileg dægradvöl.  Eftirfarandi fimmlínu hringhendu sendi ég mínum vísnavini, Björgúlfi Þorvarðarsyni á Hrafntóftum, ekki alls fyrir löngu.

                                                                                                            

 Færni þína þekkja má
 þroskinn skín með sanni.
 Ljóðin sýna líka þrá

 lofið dvínar ekki, hjá

 feikna fínum manni.            EL

Spánarspark

Nýlega skoraði Eiður mark fyrir Barcelona, þá kviknaði þessi fimmlínu hringhenda:
Eiður tekur Spánarspark
spretti frekar netta.
Brosið vekur, bætir kjark,
boltinn lekur þá í mark,
sumir sekir detta.            EL