Eggert Aron

 

Litli snáðinn á Fífuvöllum var skírður í dag og var úthlutað nafninu Eggert Aron; séra Pálmi Matt. jós drenginn vígðu vatni. Sá stutti lét sér fátt um finnast og svaf athöfnina af sér.  Foreldrarnir ungu buðu upp á frábæra súpu og ýmislegt annað góðgæti og var þessi dagur þeim og öllum sem að málinu koma til mikils sóma.        mn

Ættarmót í Fljótshlíðinni

Að baki góð helgi með ættarmót í Fljótshlíðinni innanborðs. Frá okkar ,,stórlegg" mættu fulltrúar flestra afkomenda ömmu og afa. Nú er það svo að nær helmingur afkomenda pabba (Baldurs) er búsettur erlendis en þeir sem búa hér á landi mættu vel - 9 af 13 voru á staðnum og skemmtu sér vel. Á okkar vegum voru 13 mættir og höfðum sumarbústað til umráða. Gott skipulag var á hlutunum og gekk allt snuðrulaust fyrir sig. Menn grilluðu saman og kvöldvaka var í Goðalandi, þar var slegið á létta strengi; sungið og kvæðamannakeppni  háð, leikir og ýmsar þrautir lagðar fyrir börnin eins og venja er við slík tækifæri. Og að sjálfsgðu var varðeldurinn á sínum stað. Leggurinn okkar stóð sig vel í alla staði og lagði m.a. til forsöngvara í fjöldasönginn, hreppti verðlaun í flokki vaskra barna og sýndi snilli sína í kveðskap. Er stolt af mínu fólki.

Ása og Bragi voru með fullt hús manna og Freyja og Bragi föðursystkini voru með sínu fólki.  Farið var inn að Fljótsdal eins og fyrir 16 árum. Í Fljótsdal voru systkini ömmu Guðbjargar fædd og alin upp og er núna farfuglaheimili rekið í gamla bænum. Mjög gaman að koma þangað og fögur útsýn frá bænum sem stendur innst í Fljótshlíðinni. Andblær gamalla tíma leikur um hlíðina fögru þar sem riður hetjur um héruð fyrr á öldum.

Úr faðmi stórættarinnar var haldið heim á leið og gerður stuttur stans í Litla-Holti í blíðskapar veðri. Þar hefur Eggert verið duglegur að endurreisa húsið okkar góða en fengið lítinn félagsskap frá sinni ektakvinnu sökum krankleika þeim sem hrjáir hana þetta árið. En glæsilegt er þar um að litast og lofar góðu um framhaldið. Og krankleikinn víkur fyrr en síðar og þá verður nú kátt í höllinni.

mn 

 

Andri Luke Snorrason

Nýjar myndir af Andra Snorrasyni á   http://sturluson.com/snorrason

Loksins MJÖG gott veður í Reykjavík. 

MN

Sæluvika

Í dag var svokölluð veðurleysa í höfuðborginni; logn, þurrt og skýjað. Frá höfuðstöðvum ættarinnar á erlendri grundu berast fréttir af miklum  hitum. Þessar meintu höfuðstöðvar eru í Horsens á Jótlandi - skammt frá Jósku heiðunum, þeim stað sem Danir hugðust senda Íslending til -alla með tölu - á sínum tíma. Ættmóðirin á staðnum kveðst halda síg í skugga trjáa nú um stundir; hér þarf nú ekki að draga sig í skuggann  - svo náttúrulegur er hann.

Ég fékk fyrirspurn varðandi ,,vikurnar"  sem sem stjórna lífi okkar þetta árið; gjafavika er vikan sem lyfjagjöf  fer fram og sæluvika er síðan næsta vika á eftir; sú vika er yfirleitt betri og oftast bara þrusugóð.  Gjafavikan tekur örlítið í enda eru lyfin ekki beint heilsubótarefni; frumudrepandi lyf sem veikja eða drepa nýjar frumur í líkamanum og draga úr manni mátt og hafa í för með sér ýmsar aukaverkanir.  En allt gengur þetta nú ágætlega held ég en hef reyndar ekki staðið í þessu áður og veit satt að segja ekket hvernig þetta á að vera - vantar viðmið. Núna er sæluvika.

Húsið við Austurbrún 21 er nýmálað  og  aldeilis munur að sjá það. Frunsurnar frá síðasta ári horfnar og eins og þungu fargi hafi verið létt af því, það ljómar eins og nýútsprungin rós. Merkilegt hvað nánasta umhverfi hefur mikil áhrif á mann og undirstrikar mikilvægi þess að hlúa vel að því sem næst manni er.  

Ekki meira í dag.

Maja

 

   

Skin og skúrir

Í gær rigndi eldi og brennisteini og var dagurinn notaður til að heilsa upp á unga drengi; sá nýjasti á Fífuvöllum er við sama heygarðshornið og er eins og smækkuð útgáfa af föður sínum; næstnýjasta eintakið - Nói í Fagraþingi - hló og skríkti þegar hann sá ömmu sína og baðaði út öllum öngum til að tryggja sér athygli hennar.

Síðasta vika var svokölluð ,,gjafavika" eins og við köllum það hér í Austurbrún. Að sama skapi hefur vikan á eftir ,,gjafaviku" fengið nafngift ,,sæluvika" er hún nefnd og hófst ein slík í dag.

Í gær var sem sagt rigningarbræla en í dag skein sól í heiði. Bjartsýni var pakkað niður og haldið út úr bænum og lá leiðin austur fyrir fjall (einhver undrandi?) og ýmislegt gert sér til dundurs. Í Hveragerði var áð á Konditoríinu og fyrir utan að snæða fyrirtaks brauðmeti/sætabrauð voru hin pólitísku álitamál rædd við Steinunni Jóhannesdóttur (mömmu Jóns Odds og Jóns Bjarna úr samnefndri bíómynd)og ákveðið að halda þeirri umræðu áfram við tækifæri og var þungur áhyggjutónn í umræðunni enda hafa niðurstöður úr skoðanakönnunum um fylgi stórnmálaflokka udnanfarið valdið mörgum andvökunóttum hjá sómakæru fólki (þvílík setning)!.

Hanagerðishjón - Gísli og Rúna - voru gripin glóðvolg í heita pottinum en þau risu upp úr hitanum og var skellt í nokkrar sérbakaðar vöflur. Næsti áfangastaður var Litla-Holt og var þar allt með kyrrum kjörum og kartöflugrös lofa góðri uppskeru í haust. Eftir að hafa spáð og spekúlerað, mælt og pælt að hætti landeiganda var haldið af stað heim á leið en lykkja lögð á leið og StokksEyrarbakkahringurinn tekinn. Þar var gerð tilraun til að finna sumarbústað Möggu ömmu og Helga afa en það tókst ekki og slæmri leiðsögn úr farþegasæti hinu fremra kennt um. En við reynum bara aftur seinna.

Á rás 2 í kvöld hefur Andrea aðal yljað mér um hjartarætur með tónlist Bítlanna og Janisar Jopplins - en sú frábæra listakona lést um aldur fram 1970 aðeins 27 ár ........... En nú er sem sagt sæluvika að ganga í garð hjá sumum og eru miklar vonir bundnar við hana .......... hjá sumum. Og að lokum vil ég geta þess að tengdadóttir mín Lydia er þrítug í dag og fær hún heimsins bestu afmæliskveðjur frá okkur. Er reyndar búin að fá sínar hefðbundnu kveðjur á móðurmálinu. Og Kári Daníel hringdi í ömmu sína í fyrsta skiptið í dag ........ hægt að gleðjast yfir svo mörgu.

Það er huggun harmi gegn

Að undanförnu hefur rigningin þjáð okkur landsmenn með kuldatíð.  Allar ferðir til sólarlanda að seljast upp með hverjum regndropanum sem fellur og skal engan furða.  Í tilefni þessa varð til vísa sem til gamans er sett hér fram.  Hringhenda: 

Þjóðin hnuggin, þvílíkt regn,

þó mun ugglaust hlýna.

Það er huggun harmi gegn,

horfa' á skuggann dvína.          EL.

Helgarspjallið

Enn er blessuð blíðan í Reykjavík.  Við hjónin fórum í ferðalag norður í land í síðustu viku.  Gistum í Hrísey í tvær nætur hjá Oddnýju, Hallgrími og börnum. Þá beið Hótel Eddaá Akureyri eftir okkur og gistum þar aðrar tvær nætur í ,,Skrúði" fyrnagóðu herbergi. Stóðum á hliðarlínunni á ESSOmótinu ásamt fjölmennu stuðningsliði Tinds Kárasonar úr Blikunum.  Mælum með Bláu Könnunni í göngugötunni og Greifanum á Akureyri. 

Stofndagur

Laugardaginn 15. júli klukkan 00.45 er þessi bloggsíða stofnuð af Eggerti og Maríu.

Fyrsta bloggfærsla

Þessi færsla er búin til af kerfinu þegar notandi er stofnaður. Henni má eyða eða breyta að vild.